يوم خفيف لذيذ في معرض الكتاب

اخيرا بعد طول انتظار .. قدرت اتفق انا واحمد بدر الدين ان احنا نتقابل
هنتقابل في معرض الكتاب يوم 1/2
وبعد مفاوضات مع السيد الوالد وافق اني اروح
***
الساعة دلوقت 7:32 ص يوم 1/2/2008
كنت نازل من بيتنا جري عاوز الحق قطر 7:30 اللي بيوصل القاهرة 10 اصل القطر اللي بعديه بيطلع 8:30
جريت شوية وانا قدامي مالا يقل عن ربع ساعة بيني وبين محطة القطر وكل أملي ان القطر يحافظ على عادته المصرية الاصيلة ويوصل متأخر
لقيت توك توك جاي من ورايا شاورتله
المحطة ياريس
وحمدت ربنا
وصلت المحطة والقطر واقف فيها
قمت طيران اخدتها جري ولحقت اركب فيه
احمدك يارب
***
وصلت القاهرة – للعجب – كما هو مفروض الساعة 10
سألت عن موقف احمد حلمي ( هو احمد بدر اللي شرحلي كده ) وهناك سألت عن أي ميكروباص ممكن يوديني المعرض
قاموا حاطيني في ميكروباص بيروح الحي السابع وقالوا ده بيودي المعرض
قلت ما علينا
اما السواق نزلني عند المكان اللي المفترض ان اللي نازلين المعرض ينزلوا عنده افتكرت اني هبص يمين او شمال الاقي المعرض
بس الحمد لله في الوقت ده كان في اخ واضح من شكله انه سلفي ( حف الشاب واطلاق اللحية وتقصير الهدوم ) كان رايح المعرض هو كمان
قالي انت رايح المعرض
قلت له اه
قالي تعالى هنعدي الكوبري ده ( كوبري من بتوع المشاة دول ) وننزل مش عارف ايه كده
فهمت ان الكوبري ده وسيلة هنعدي بيها الشارع نلاقي المعرض قدامنا
لقيت ان احنا بعد ما عدينا مفيش أي اثر لأي حاجة ولقيته بيقولي هنمشي مش عارف فين وندخل منين كده
قلت اكيد قدامنا
بعد ما مشينا حوالي عشر دقايق ( اتعرفنا فيها على بعض ) ابتديت اقلق منه مش معقول السواق هينزلنا على بعد ربع ساعة مشي من المعرض دا شكله نصاب وعامل شيخ … بس كنت مطمن لأن احنا كنا لحد دلوقت في طريق عام مليان عربيات وممكن لو حصل حاجة كده ولا كده اتصرف
حبيت اقوله ( انت موديني فين ) بس خفت اظلمه فجيبتهاله بطريقة تانية
قلت له كأني باتريق ع السواق ( بقا هو السواق كده منزلنا عند المعرض ) قالي ( ماهو مكنش قدامه غير كده ) ودخلنا في الوقت ده شمال من شارع
وبصيت لقيت المعرض قدامي
فاستغفرت ربنا على سوء ظني بالراجل وروحنا قطعنا تذاكر ودخلنا وسيبنا بعض طبعا
***
اتصلت بأحمد بعد ما دخلت زي ما اتفقنا عشان يجيلي عند المكان اللي انا فيه
وصفت له مكاني ( انا عند دار الشروق وجنبي مكتبة مدبولي وقدامي العبيكان ) قالي استناني عند العبيكان وعرفته اني لابس اسود
وهو قالي انه لابس جاكت اسود وتحته تي شيرت اخضر
بعد شوية لقيت احمد بينادي عليا
وقابلت احمد لاول مرة

احمد في الصورة دي كان باين عليه مكلضم وشايل طاجن سته حتى مكنش عاجبه شكله فيها .. بس اعمله ايه .. انا بانشر الحقيقة كاملة

***

طبعا انا كنت واخد فكرة كويسة مسبقا عن شخصية احمد من خلال تواصلي معاه على النت .. عشان كده مانطبقتش عليا نظرية اني اكون 70% من فكرتي عنه من اول نظرة دا لأني كان عندي فعلا اكتر من 80% عن شخصيته
لكن فعلا انا لو مكنتش اعرف قبلها كنت هاخد فيه احلى بمبة
لأن الراجل منظره طيب .. طيب .. طيب خااالص
ماقصدش الطيب اللي اخلاقه كويسة يعني ( لأن طبعا أحمد اخلاقه مش كويسة خالص :D) انما أنا قصدي الطيب اللي هو بمعنى الغلبان اللي على نياته و( يتضحك عليه )
دا اللي كان ممكن افتكره عن احمد لو مكنتش اعرفه قبلها لأن شكله فعلا مخادع جدا
يعني دا لو ربنا شاء وحقق له امنيته وبقى مذيع او حتى صحفي وجه يعمل حوار صحفي مع حد فبجد ضيفه هيتخم فيه اوي لو مكنش يعرفه كويس قبلها
لأن ممكن يفتكره محاور غلبان .. ولو حصل قولول يا رحمن يا رحيم ع الضيف ده هيبقى عامل زي الطالب اللي رايح يمتحن شفوي عند الاستاذ عبد الجبار وهو مش مذاكر حاجة
بعد كده احمد اتصل بناس هيقابلهم
اللي هما المدون عمرو سلامة ( لسه عايش ) وعمار البلتاجي ( على بصيرة )
قابلنا عمرو سلامة وكان جايب معاه اخواته – تلاتة – منهم واد صغير ولمض وزي العسل
ابتدينا نلف اللف اللي أي حد ممكن يلفه في المعرض وبعد كده قابلنا عمار البلتاجي وحب احمد يهدي النفوس قام قالي بعد ما صلينا الضهر والعصر قصر وجمع تقديم ( على فكرة عمار من اكتر غير المؤيدين لكتاباتك )
ندل الواد ده انا لا يمكن انقد أي مدون قدامه أبدا
بس عمار قالي لا والله انا بس مبحبش الكتابة الساخرة عامة عشان في ناس بتستخدمها في شتيمة غيرها .. يعني هو لو شتم عادي كده هيكون شكله وحش يقوم كاتب موضوع ساخر عن الشخص ده ويشتمه براحته
( طيب يا باشا ..بس كده .. غالي والطلب رخيص .. هتشوف اول موضوع هكتبه عنك اول ما اروح ) ما قولتلوش كده طبعا انا كنت هقولها بهزار يعني بس طنشت
مشينا مع عمار شوية وكان معاه هو كوفيات من بتاعت فلسطين قالي انه بيطبعها وبيوزعها
وبعد كده سابنا على اساس انه وراه مشوار وهييجي ع الساعة تلاتة ولا اربعه ( مجاش لحد الساعة ستة )
اغلب الوقت كنت ماشي انا واحمد بدر لوحدنا وكنا ساعات نقابل عمرو ومعاه حد من اخواته ونمشي معاه وساعات نسيبهم
حسب الظروف
بس حقيقي اتبسطت جدا بمعرفة احمد

احمد بيعافر عند امانات الأهرام عشان يشيل شنطنا اصل كان عليها زحمة جامدة

***

اتكلمنا كتير طبعا وكان من ضمن اللي اتكلمناه انه عرفني ازاي تعمل حوار صحفي مع شخص ما .. ماهو واخد دورة قبل كده بقا
وبعدين صدمني
لما قولتله اني عاوز اكتب في أي جرنال بس مش عاوز ابتدي بشغل اني اجري ورا الخبر ده واعمل حوارات صحفية وكلام من ده
قالي مش ممكن هتكتب في أي جرنال مش غير ما تبتدي كده
الواد ده فقر .. لو حد عنده اخبار بخصوص الموضوع يفيدنا يا جدعان .. بس ياريت تكون مبشرة والا ….
احمد اشترى كمان كتاب لكيفية كتابة الخبر الصحفي ( عمرو اشترى تلات كتب برضه بخصوص المجال الصحفي منهم بتاع احمد ده )
.. والواد ده طلع عنده جر أة صحفية جامدة
كنا قاعدين في دار مش عارف ايه كده
دخل واحد صحفي تبع اذاعة مش عارف ايه كده برضه
بيقول للراجل انه عاوز يعمل معاه حوار صحفي بس يظهر ان الراجل رفض بس احمد ما فوتش الفرصة وقام طالع ورا الراجل وسأله ( حضرتك كنت بتسأله عن ايه وانت تبع ايه وكلام من ده يعني وفي الآخر اخد نمرة موبايل الراجل والراجل اخد نمرة احمد وكتب عنده ( صحفي حر ) )
مش بقول جريء
موقف كمان
كنا عند دار اطلس وعرفنا ان يوسف معاطي رايح يوقع كتاب من الساعة 4 : 6
طبعا باعتبار ان يوسف معاطي كاتب ساخر ( ولو انه مش المفضل ) قلت لاحمد نروح اهو أي حاجة والسلام
روحنا انا واحمد الساعة خمسة كده لقيناه قاعد في اوضة المدير معاه واحدة صحفية بتعمل معاه حوار
فضلنا واقفين بره واحمد قالي ما تتصور معاه
قلت له ازاي
قالي اه والله روح عليه اول ما يطلع وخليك جريء وقوله بقا والله يا استاذ يوسف انا معجب جدا بكتابات حضرتك ويشرفني جدا اني اتصور مع حضرتك وكلام من ده يعني
قلت له ياعم الراجل لابس بدلة وشكله نضيف وواثق من نفسه وهيخليني ارتبك
قالي انت لازم تكون عندك جرأة امال لو هتعمل حوار مع رئيس الوزرا هتعمل ايه بقا
بعدين لقينا الانسة اللي ع الباب بتقولنا انتو مستنيين استاذ يوسف
قلنا لها اه
قالت طب استنوه هناك هو خمس دقايق وطالع
قلنا لها ماشي
جيت اروح هناك لقيت احمد مسكني وبيقولي انت ( مش فاكر الشتيمة بس هي حاجة زي غبي او عبيط كده ) بقا في واحد صحفي بت سكرتيرة تقوله روح هناك يروح خليك واقفله
قلت له ياعم صحفي مين .. انا جاي هنا معجب قال صحفي قال
المهم فضلنا واقفين
واما طلع ماعرفناش نكلمه برضه غير لما راح عندالـ(هناك ) اللي بنت قالت لنا عليها

في الصورتين دول كانت قناة دريم1 بتعمل حوار مع الاستاذ يوسف – قبل احنا ما نكلمه – ومش عارف ايه الازرق المنعكس عليه في الصورتين ( على وشه في الاولى ولياقة البدلة في التانية )

***

هناك بقا قولت لاحمد بص انا مش هعرف اقول المقدمة اللي انت قلتها دي انت خش عليه وقوله ان احنا الاتنين معجبين وكلام من ده وانا هدخل وراك ونقوله ان احنا الاتنين عاوزين نتصور معاه
قالي لا هقوله عليا انا بس
راح احمد يكلمه .. ضحك عليا ابن اللذين وماقالش للراجل ولا كلمة قاله بس ( استاذ يوسف ممكن صورة مع حضرتك ) والراجل بكل بساطة وبوش مبتسم قاله ماشي
وصورتهم هما الاتنين

وزي مانتو شايفين احمد عامل زي الواد بتاع جيرو لاند .. اما ا/يوسف كان مدير وشه لأني بعد ما صورت قلت له خلاص كده ومكنتش اعرف ان الموبايل ده من اللي بيلقط الصورة بعد انت ما تضغط ع الزرار بثواني ( لاحظو النقطة الزرقة على بدلة ا/يوسف برضه )

***

وبعدين انا قولتله واتصورت معاه انا كمان

مش عارف انا كنت عامل زي العبيط كده ليه يظهر اني حاولت ابتسم اكتر من اللازم فطلعت الصورة لواحد من ابناء السبيل زي مانتو شايفين كده .. هنا النقطة الزرقة منعكسة على بُق ا/يوسف بالظبط

***

طلع موضوع بسيط خالص واحمد هو اللي كان معقدها
بعد كده روحنا اشترينا كل واحد كتابين ( او كتاب ورواية للدقة من دار الشروق )
وجينا نمشي بقا
الساعة 6 طلعنا بره نركب اتوبيس
احمد كان هيركب لمكان يسمى بالدمرداش وانا هكمل لحد محطة القطر ( رمسيس )
ووصل الاتوبيس .. وعينكم ما تشوف الا النور
حقيقي اول مرة احس بمعاناة اهل القاهرة في الاتوبيسات
بجد رحلة كفاح وجهاد رهيبة
علبة سردين بمعنى الكلمة
انا كنت مفعوص وسط البشر ومكنتش عارف اني عايش الا من خلال الجرنال اللي طالع مني وباين منه حتة غير كده كنت واقف ع السلم وناس فوقي وناس تحتي وناس بتزقني من ورا وناس وبترجعني من قدام وبين كل فين وفين اسمع صوت احمد ( انت فين ) اقوله ( عايش )
بجد جو خليق انه يطلع احسن كاتب ساخر في مصر
وجو خليق بإنه يعمل ثورة
انتو ساكتين ازاي على كده يا جدعان
يخرب بيت كده بجد .. دا جحيم
المهم بعد ما نزل احمد وسلامات ع الطاير ( مين هيقدر يمد ايده في الجو ده وهو يادوب قدامه خرم بيوصل له هوا وياريته نضيف )
وصلت محطة القطر وزي ما حصل الصبح بالظبط
كان القطر في المحطة وجريت عليه والحمد لله لحقته
فضلت جوه القطر طول الوقت صاحي نايم وكنت سرحان خالص مع نفسي شوية اقرا في الجرنال وشوية اقلب في الكتب وشوية امدد رجلي ع الكرسي اللي قدامي
وف وسط سرحاني وانا بقرا في كتاب كده سمعت ناس في العربية واحد بيقول للتاني هي دي محطة ايه قاله ايتاي البارود
يا خبر
قمت زي اللي اتقفش بيحشش وقلت له هي دي محطة ايتاي البارود
قالي اه
قمت ماسك الشنطة والكتاب والجرنال ونازل جري ( تلات مرات الحق نفسي في اخر لحظة مع القطر .. شفتوا الحظ )
وطبعا الراجل بصلي زي ما اكون عبيط
بس المهم الحمد لله وصلنا زي الفل من غير أي اصابات ولا مصايب
حمد لله ع السلامة

قال اجازة قال

انا مخنوق ومولع بجد

يعني انا بقالي تلتاشر قرن و7سنين مستني النهارده عشان اخد الاجازة

ييجوا المدرسين ولاد ال….. ( مع احترامي لأي مدرس لسه بيحترم مهنته ) ينكدوا علينا كده ف اخر يوم امتحانات ويعملوا عملة زي دي

يعني يا ولاد ال…. الواحد يذاكر مايذاكرش هي هي برضه

فوزي زي الحاج

انا محبط اخر حاجة

وكل اللي كنت ناوي اعمله ف ام الاجازة حاسس انه كان خازوق كبير

عندي كمية احباط تخلي النضيف جربان

والغني عدمان

والمفتري غلبان

والشبعان جعان

والله حاسس بقهر رهيب … يعني زي مايكون ….

يعني …. طب … بس …..

بلاش اتكلم لاحسن عياري يفلت

يعني يخلوا الواحد يستفتح اجازته كده برضه

دول حتى بوظو عليا فرحة اني كنت ناوي اطلع بطاقة الأجازة دي

يا ولاد ال ……

لا ف إيده سيف ولا تحت منه فرس

النهاردة عيد ميلاد حد مش عادي أبدًا
واحد راشق في قلوبنا كلنا
واحد من اعظم اهل زمن الجميل
أيام ما كانت مصر بتشتي مواهب
من اربعينيات القرن اللي فات وطالع
ايشي يوسف ادريس على نجيب محفوظ على يوسف السباعي على توفيق الحكيم على بيرم التونسي على العقاد على .. على …
وده واحد من اعظم المواهب دي
رسام وشاعر وسيناريست وفنان و… و…
كان جامعة فنون
وكان فنان بحق وحقيق
بحق وحقيــــــــــــــــق وحط تحتيها 100 خط دي
النهاردة عيد ميلاد عمنا صلاح جاهين
زعيم قلوب الملايين
عيد ميلاد صاحب البسمة الحلوة
والأشعار اللي ترشق في لغاليغ قلبك من غير لا إحم ولا دستور
عمنا صلاح جاهين بتاع الليلة الكبيرة والعالم الكتيرة
عمنا صلاح جاهين بتاع حلاوة زمان والعروسة والحصان
عمنا صلاح جاهين بتاع موال عشان القنال
عمنا صلاح جاهين بتاع والله زمان يا سلاحي
عمنا صلاح جاهين بتاع الرباعيات
عمنا صلاح جاهين بتاع التلامذة وعم حمزة
عمنا صلاح جاهين بتاع ملحمة على اسم مصر
عمنا صلاح جاهين اللي فاق فنه كل الحدود
عمنا صلاح جاهين صاحب الإنسانية نادرة الوجود
ممكن تلاقي انسان موهوب وماعندوش الإنسانية دي كلها
وممكن تلاقي إنسان ( إنساني ) بس ماعندوش الموهبة دي كلها والقدرة على التعبير عن اللي جواه كده
لكن إنك تلاقي الاتنين مع بعض في بني آدم واحد !…
صعبة أوي ونادرة أوي أوي بجد …
***

عمنا صلاح جاهين اللي لو لقى الغرور واخدك وشايف نفسك ومتعنطز يقولك :
يا طير يا عالي في السما طظ فيك
ماتفتكرش ربنا مصطفيك
برضك بتاكل دود وللطين تعود
تمص فيه يا حلو ويمص فيك
عجبي!!!
ولأن الكفن مالوش جيوب والموت مالوش كبير بيقولك :
ضريح رخام فيه السعيد اندفن
وحفرة فيها شريد من غير كفن
مريت عليهم .. قلت يا للعجب
لاتنين ريحتهم فيها نفس العفن
عجبي !!!
وعشان تعرف ان الاختلاف في الرأي لا يفسد للود قضية .. بل ممكن يزود الود كمان بينكم – من وجهة نظره بيقولك :
لولا اختلاف الرأي يا محترم
لولا الزلطتين ما الوقود انضرم
ولولا فرعين ليف سوا مخاليف
كان بيننا حبل الود كيف اتبرم !
عجبي !!!
ومن أحلى رباعياته اللي بتقولك انك لازم يكون ليك مبدأ وهدف وتحارب عشانه حتى لو هو هدف مستحيل وتحارب عشانه سواء وصلت له او ما وصلتلوش :
أنا اللي بالأمر المحال اغتوى
شفت القمر نطيت لفوق في الهوا
طلته ما طلتوش إيه أنا يهمني
وليه .. مادام بالنشوة قلبي ارتوى
عجبي !!!
ولو خفت مرة هتلاقيه جنبك بيقولك :
ولدي نصحتك لما صوتي اتنبح
ماتخافش من جني ولا من شبح
وان هب فيك عفريت قتيل اسأله
ما دافعش ليه عن نفسه يوم ماندبح
عجبي !!!
ولو تهت واحترت وقلبك تعب وبعدت عن ربنا ومحتاجه :
ياللي بتبحث عن إله تعبده
بحث الغريق عن أي شيء ينجده
الله جميل وعليم ورحمن ورحيم
إحمل صفاته .. وانت راح توجده
عجبي !!!
لو فضلت اعلق على رباعياته مش خالصين في ليلتنا .. كفاية كده

***

عمنا صلاح جاهين اللي هو – بالإضافة لعمنا الفاجومي – صاحب اروع الاشعار اللي اتكتبت في حب مصر
وهو كمان صلاح جاهين اللي اختفى بين الناس وماعادش واخد حقه
والإعلام باعه زي ما باع معظم الموهوبين اللي زيه ( إذا ما كانوش كلهم )
بس جرنال الدستور عامل في العدد الإسبوعي بتاع امبارح ملف رهيب عنه
7 صفحات بالتمام والكمال
جايبين عنه كل حاجة
بجد ملف شامل وروعة
الصحفي اللي اسمه محمد توفيق ده عليه شوية ملفات مالهاش حل بجد
وبجد كمان هيفوتكم كتير لو ما قريتوش الملف ده

***
انا بقى جايب لكم شوية لنكات كده على ما قسم
حاجة على قدنا يعني 😀
دي صفحة صلاح جاهين على الويكيبيديا
ودا موقع فيه رباعياته
ومن هنا تقدروا تحملوا كتاب رباعياته
( من تقديم يحيى حقي .. أي نعم هي مش الرباعيات كلها بس كمية مش بطالة )

ومن هنا قصايده
ومن هنا ضروري تحملوا ملحمة على اسم مصر الروعة
( بجد هيفوتكم كتير لو ماتعرفوهاش وماحملتوهاش )
وأخيرًا دا جروب من 58 جروب لمحبيه على الفيس بوك

وآخر حاجة بقى أحب اتعنطز عليكم واقولكم ان انا من مواليد نفس برج صلاح جاهين
برج الجدي ( اللي زمانه بقى تيس على رأي جحا )
لا وإيه .. فرق بيننا يوم واحد ( هو 25 وانا 26 ديسمبر )
لا وايه دا برج جحا كمان
احنا بعون الله هنثبت ان الإنسان أصله جدي

الحكومة .. البكر .. الرشيدة

الحكومة .. البكر .. الرشيدة *

( تهييس)

الرشيدة .. كلمة لا تفتأ وسائل الاعلام تنعت بها حكومتنا – الرشيدة – ( بالاضافة الى بعض الصفات الاخرى ) حتى اضحت صفة ثابتة ملازمة لحكومتنا – الرشيدة – ملازمة البردعة للحمار ، الأمر الذي استنفر محركات الاستغراب لديّ التي طرفت بدورها باب خلايا مخي الرمادية لأجل عملية بحث عن تفسير مبلوع للكلمة .
إن النظر في تاريخ حكومتنا – الرشيدة – والتأمل فيه .. بدءا من قرارتها حكيمة مرورا بأسلوبها في مواجهة الصعاب وحل المشاكل ، وانتهاءًا بأسلوبها – الأرعن – مع معارضيها والذي يجبر الشعب بجميع طوائفه على أن يتعاطف مع المعارضة ويؤيدها ، والمواقف الشاهدة على هذا على قفا من يشيل
هذه الحكومة ذات التاريخ الحافل بكل ما هو غبي ومثير للنكت لا يمكن نعتها بكلمة الرشيدة المفهومة لنا جميعا ولو على سبيل المجاز ، فلم يحن وقت حركة احبال ابو الهول الصوتية بعد ، فهي ابعد ما تكون عن الرشد .. لذا كان لابد من بحث عن تفسير مبلوع لكلمة ( الرشيدة ) التي تُنعت بها حكومتنا – الرشـــــــــيدة –
وبعد بحث – مش مضني عشان نكون صادقين – توصلت حتى لحظة كتابة هذه السطور الى ثلاثة تفسيرات مهضومة للكلمة ( مع اني كنت بدوّر على تفسير مبلوع مش مهضوم لكن ياللا قدر ربنا ) : –

· التفسير الأول :-
ان صفة الرشيدة ما هي في الواقع الا رمز للمعزة ( رشيدة ) رفيقة الشخصية الكارتونية الشهيرة ( بكــــار )
والحق يقال .. فإن اختيار الحكومة – في حالة صحة هذا الاختيار – يكون اختيارًا موفقا الى حد كبير ( على عكس العادة والمتوقع ) .. فاختيارها لشخصية كارتونية ( طفوليـــة ) وهي في ذات الوقت شخصية ( حيــوانـيـــــة ) انما ينم عن مدى ادراك حكومتنا – الرشــــيدة – لقدرها ومستوى عقليتها وهي في هذا قد نجحت في وصفها بأفضل بكثير مما فعلت أفضل وابلغ أقلام والسنة المعارضة .. برافو حكومتنا – الرشيـــــــــدة – الاختيار الوحيـــد العبقري في حياتك
· اما التفسير الثاني الذي افرزته ارهاصات خلايا مخي البوستاج :-
أن الاصل في الوصف هي تلك الجملة التي ينطقها المأذون في كل عقد زواج واصفًا بها العروس .. ” زوجتك موكلتي .. معرفش مين .. البكر .. الرشيدة …. الخ “
فكانت الحكومة توصف في الأصل بـ(ـالحكومة البكر الرشيدة ) .. الى أن جاء من ( اغتصبهـــــا ) ففض بكارتها واستولى عليها .. ثم محا كلمة ( البكر ) بعدما افتضح أمره .. وبقيت كلمة ( الرشيدة ) وبقى هو مستوليا على الحكومة والسلطة .
· التفسير نمبر ثري والأخير :-
أن الحكومة – الرشيـــــدة – ما نُعتت بهذا الوصف إلا من قبيل [ الهزار البارد ] فكما يسمى رئيســنا [ مبارك ] ورئيس وزرائه [ نـظيـف ] ورئيس برلمانه [ ســـرور ] ورئيس مجلس شوراه [ شريف ] اشمعنى حكومته يعني ماتبقاش [ رشيــــدة ] ؟؟!!

________________________

* منشور في مجلة تحت الكوبري الالكترونية هنا

* منشور في مجلة ميكانو الالكترونية هنا

تيجي نلعب عسكر ومدوِّن

من الواضح أن حكومتنا – الرشيدة – قررت أن تعمل بمقولة سقراط ” اعرف نفسك بنفسك ” ، بيد أن فهم الأمر على جانبه الصحيح قد جانبهم كما هي العادة .. أو ربما هو الفكر الجديد الذي يعتنقونه .. فهم يرون بفكرهم – الجديد طبعا – أن معرفة الشخص تعني فضيحته ، لذا فقد طبقوا المقولة باعتبارها ” افضح نفسك بنفسك ” وقد بدت خطواتها جادة في تحقيق هذا الأمر ( فضيحة نفسها )
***
ومن المؤكد كذلك أن المدونين أصبحوا خازوقا في مضاجع وأرائك أولئك الرابضين على قلوب العباد في بلادنا المهروسة …
ليسوا خازوقا عاديًا ؛ بل هو خازوق من اللي بيلف ، وإلا فَبِم تفسر لي حملات الإبادة الفكرية المقامة عليهم بشتى السبل ؟!
الفكر لا يواجه الا بالفكر كما يقولون دائما ، هذا اذا كان هناك فكر ليواجهه أصلاً !
وإذا كان الصوت العالي في الحوار دليلا على ضعف الموقف – كما يقولون أيضًا – فلا شك أن حكومتنا غرقانة في شبر مية ومش عارفة تعمل إيه ؛ يبرهن على ذلك علو صوتها مُمَثَلا في بطش بلطجيتها …
كان الله في عونهم صراحة … هيلاحقوا على مين وللا مين ؟ المعارضين ؟ وللا بدو سينا ؟ وللا الصحفيين ؟ وللا المدونين ؟ وللا الطلبة المتظاهرين ؟ وللا …. ؟ وللا …. ؟ ……
***
بضع شباب لم يتجاوزوا مراحل الدراسة بعد من هذا الشعب ( الغير ناضج سياسيـــًا كما يقول رئيس وزراؤه ) أثاروا قلق الطغاة وأقلقوا راحتهم وسببوا لهم الأرق بكيبورداتهم
فقط لأنهم أبَوا أن يكونوا شياطينًا خُرسًا …
فقط لأنهم أبَوا إلا أن يقولوها كلمة حق في وجه سلطان جائر …
فكان مصيرهم أن أصبحوا حلقة ضمن مسلسل ” افضح نفسك بنفسك ” الذي تتبناه وتنتجه حكومتنا الغراء ( والغِراء بكسر الغين بالمناسبة مأخوذة من مادة الغِراء اللاصقة المعروفة وفي هذا إشارة لمدى التصاق هذه الحكومة بكراسيها ، والبعض ينطقها بالخاء )
أرادت أن تخرسه ؛ فقررت في محاولة غبية منها الى حد يثير الضحك أن تمنعه من حقه القانوني في السكن بالمدينة الجامعية لعل هذا يخرسه فكانت النتيجة الحتمية لأسلوبها المتخلف أن فضحت نفسها بنفسها أمام وسائل الإعلام المختلفة وأمام منظمات حقوق الإنسان التي أخذت تطالب بحق الطالب “ أحمد عبد القوي ” في السكن بمدينته الجامعية الذي لم يمنعه حرمانه من حقه – القانوني – في السكن بالمدينة الجامعية من استكمال مسيرة تفوقه التي دأب عليها فحصل على الامتياز فحصل على الامتياز في المادتين اللتين اُختبر فيهما حتى الآن هذا العام ضاربًا عرض الحائط بكل ظنونها وآمالها التي بنتها على أنها بحرمانه من السكن إن لم تمنع نشاطه التدويني فهي على الأقل قد تعرقل مسيرة تفوقه مما قد يؤثر عليه بالسلب نفسيا ومعنويا ، غير أنه خيّب آمالهم وإداهم خازوق كبييييير …
ثم وفي محاولة أخرى منها لإسكات صوت الشباب والمدونين الذين – كما قلت – أصبحوا يمثلون خازوقا كبيرا في مضاجعهم وارائكهم الوثيرة قررت حرمان الطالب ( عمرو سلامة ) من حق قانوني كذلك وهو دخول انتخابات اتحاد الطلبة بجامعة سيناء وذلك لنشاطه التدويني فلم تجن إلا – كالعادة – مزيدًا من الفضائح أمام الرأي العام ، ولا شك أنها ( الحكومة ) الآن تعض أصابعها من الندم وتتمنى لو كانت وافقت على دخوله ما كانت لتنال مثل هذه الفضيحة …
هذا طبعا بخلاف العدد الكبير من المدونات التي تعرضت للإغلاق من قِبل جوجل ، ولا يمكننا أن نرفع عنهم أصابع الإتهام حِيال هذا الأمر بحجة أن جوجل غير مصري فنحن نعرف أنهم دفعوا من قبل للقائمين على موقع يوتيوب الشهير لحذف فيديوهات تعذيب رجالها للمواطنين !!!
ثم أتت قنبلة الموسم ( اللي كله قنابل أصلا ) في مسلسل الفضيحة المستمر ( تطبيقا لمقولة سقراط بفكرهم الجديد اوعوا تكونوا نسيتوا ) بإعتقال العديد من المدونين وعلى رأسهم العميد ميت ” محمد عادل ” الذي يبدو أنه وصل الى حد من الخطورة على مضاجعهم بالدرجة التي جعلتهم يتصرفون بجبن اليهود ويخشون كما لو كانوا عصابة ( وهم كذلك فعلا ) الإفصاح عن مكان اعتقاله أمام حشود الشباب الغاضبة التي خرجت لتؤيده – سواءا على أرض الواقع او على النت – وتطالب بالإفراج عنه !!!
كل هذا الاهتمام من الحكومة بهؤلاء الطلبة الجامعيين والخوف منهم ، وكل هذه التحركات الأمنية البلطجية خوفـًا من بعض الطلبة تؤكد بما لا يدع مجالا للشك مدى ضعف هذا النظام وجبنه أمام هؤلاء الشباب ، وتؤكد كذلك مدى فاعلية نشاطهم وتأثيره ، فلو كانوا غير مؤثرين لما نظرت لهم الحكومة أصلا …
وكل هذا يؤكد كذلك أن هذا الجيل من الشعب المصري ناضج سياسيا يا دكتور نظيف ، ناضج وصابح وطازة أوي ويعجبك
ويؤكد أيضًا أن هذا الجيل الصاعد قادم يحمل شمس التغيير بيديه التي يحمل عليها أرواحه كذلك من أجل الحرية ، وأنه قد قرر أخيرًا التخلي عن النظرية المصرية الفلسفية العميقة ” امشي جنب الحيط ” و ” الله جاب .. الله خد “
فهم ليسوا أقل من الحمار الذي ثار قائلا :
وارمي اللجام واقطعه *** دانا ماتولدتش بيه
وأنا من هنا أعلن تضامني بكل قلبي مع هؤلاء الأبطال وهو أقصى ما يمكنني تقديمه لهم في الوقت الراهن ، ولو كان بيدي أكثر مما كتبت لأجلهم لما ادخرت وسعا لتقديمه ولكني لا أملك لهم – حاليا – الا دعائي وكلماتي ، ولحين أن استطيع تقديم ما هو أكثر هاأنذا امنحها لهم عساها تكون سببا في فك كربهم وتحقيق الهدف بالتغيير إن شاء الله …
***
تذكرون تلك اللعبة التي كنا نلعبها ونحن صغار … لعبة ” عسكر وحرامي ” والتي بمقتضاها كنا ننقسم الى فريقين … الفريق الأول فريق العسكر والذي كان يسعى للقبض على الفريق الآخر ( فريق الحرامية ) ، اعتقد أننا تماشيًا مع متطلبات العصر يجب أن نغير اسمها إلى لعبة
” عسكر ومدِّون “
هذا إذا كانت هذه الألعاب لا تزال على قيد الحياة أصلا
***

رسالة إلى أصحاب السخافة والجهالة والسمو ملوك وأمراء السعودية اللئام

بسم الله الرحمن الرحيم

السادة اصحاب السخافة والسمو والجهالة ملوك وامراء السعودية اللئام /
تحية منيلة بستين نيلة وبعد ،
أُقر أنني ارسل اليكم رسالتي هذه وانا بكامل قواي العقلية
ولتعذروني يا سادة ان كنت قد وضعت الرسالة هنا خطئًا فقد باءت بالفشل كل محاولاتي للحصول على ايميل مليككم عبد الله او أي منكم .. وبنفس النتيجة حظيت محاولاتي للحصول على رقم موبايله بالإضافة الى أن الاتصال بسيادته غالي صراحة فهو يكلف 3 جنيه في الدقيقة .. وفي بعض الروايات جنيه ونص بس
اما نشر الرسالة هنا فهو على أقصى اعتبار لن يكلفني أكثر من ساعة بجنيه في أي سيبر لكتابة الرسالة ونشرها على مواقع النت المختلفة
وهكذا ترون سيادتكم ان نشر الرسالة هنا كان أجدى وأوفر … وإجباريا أيضا ….
ولتسمحوا لي يا سادة أن أتجرد في رسالتي إليكم من شتى أنواع النفاق الذي لطالما ذممتموه ونهيتم عنه باعتباره منكر ورجس من عمل الشيطان وابن ستين كلب …
انا يا سادة لست بطالب مال ولا منصب ولا جاه ولا شوكولاتة جالكسي
انا ما ارسلت رسالتي هذه اليكم إلا لأطالب جهالتكم وجميع افراد حكومتكم باعادة التعليم ودخول المدارس مرة اخرى …
ولا عيب يا أصحاب الجهالة في طلب العلم مرة اخرى .. كما أني احسب انكم لم تبلغوا بعد درجة من الزهد تمنعكم من شراء كتاب الفقه للصف الأول المتوسط عندكم
وإن تطلب الأمر ان نعلن عن مبادرة تضامن عربي لجمع المال اللازم لشراء الكتاب وممكن مدرس خصوصي كمان لتعليمكم القراءة والكتابة اذا لزم الأمر لمحو ما يبدو على جهالتكم وحكومتكم من جهل فزيع وفلوسنا كلها فداكم يا فندم فقولولنا وماتتكسفوش يعني .. احنا اخوات وولاد عم والناس لبعضيها برضه
أرى بعيني خيالي بعضكم وقد وصل الى هنا من الرسالة فيخرج سواكه من فمه ( لأن السواك سنة طبعا وملتزمين بيها ) ثم يبصق جميع ما حوى فاه من قرف على الرسالة قائلا في اشمئزاز كما لو رأى حماته : كفر عدو الله وتبت يداه .
ولكن مهلا يا صاحب الجهالة منك له …
فقد أصبح الأمر وكسة كبرى وخيبة بالويبة وأمر لا يسكت عنه
انتم تحتاجون الى تعلم مبادئ فقه الشريعة التي تحكمون بها …
كيف يا اصحاب الجهالة يصل الجهل بقضاتكم الى الحكم على شخص ما بالجلد 1500 جلدة باعتباره حكما شرعيا ؟
يعلم الله أنه لولا الكلفة بيننا وعدم امكانية نشر الأمر في الرسالة لأسمعتكم ذلك الصوت الرخيم الشبيه بحرف الخاء الناتج عن تضاغطات وتخلخلات موجات الهواء المسحوبة عبر الأنف الى داخل جوف الإنسان ثم اتبعته بتلك الكلمة الأثيرة التي كنا نحار في وصفها حتى أتى إتش دبور ليضع حدا لحيرتنا بعبقريته
وعلماؤكم ؟؟؟ أين علماؤكم مما يحدث ؟؟؟
ام أن غاية تطبيق الشريعة عندهم هو قتل ميكي ماوس ؟؟؟
أخشى ان يكون الأمر قد وصل بهم الى ان ينطبق عليهم قول رسول الله صلى الله عليه وسلم
” إن الله لا يقبض العلم انتزاعا ينتزعه من العباد ، ولكن يقبض العلم بقبض العلماء حتى اذا لم يبق عالما اتخذ الناس رءوسا جهالا ، فسئلوا فأفتوا بغير علم فضلوا وأضلوا “
او يكون الأمر قد وصل بهم الى الفساد والسكوت عن الحق ويكونون ممن يشترون بعلمهم ثمنا قليلا … لبئس ما يصنعون ؟
غير أننا نحسن الظن بهم ونلتمس لهم الأعذار السبعين ونزيد كمان
محدش عارف ظروف حد .. يمكن الكهربا قاطعه يمكن النت فاصل ويمكن وصلة الدش مش مظبوطة ويمكن بتاع الجرايد عندهم بطّل يجيب جرايد … الله اعلم
رحم الله علمائنا الاوائل … ما كانوا يخشون ابدا من قول أمَـــرِّ كلمة حق عند اشد السلاطين جورًا ولو كلفهم ذلك حياتهم
البعض من المدعين يفتري عليكم الكذب يا اصحاب الجهالة ويقول انكم تجلدون هكذا ظلما وعدوانا
غير اني امتنع عن سوء الظن واحسن الظن بكم وأقول إنكم لا تظلمونهم بل كل ما في الأمر هو جهلكم بالأحكام
فأنا أظن – والله اعلم – ان أهل مكة قد كفوا عن ظلم المسلمين وتعذيبهم منذ أن دخلت قريش في الإسلام …
نحتاج الى اعادة تعليمكم وحكومتكم مرة أخرى يا أصحاب الجهالة لكي تدركون ما به تحكمون
وإلا أفيرضيكم أن يفسد برستيـﭻ أمتنا أمام سائر الأمم ؟؟؟
أيرضيكم يا سدنة بيت الله الحرام ؟؟؟
لا والله لا يكون ( على اعتبار انه لسه ما كانشي يعني )
وإلا فارحلوا يا سادة عن حكم هذه الأراضي المقدسة الطاهرة ( آه والنبي ارحلوا العملية مش ناقصاكم اساسا )
تقولون يا سادة انكم تجلدونهما تطبيقا لشرع الله
والشرع بريء منكم براءة الذئب من دم ابن يعقوب
بداية يجب أن نتفق على أن ما تفعلونه ليس حدا من حدود الله ولا يمت للحدود بصلة … فالحد بالجلد لم يرد إلا في جرائم ثلاث …
في الزنا ، وفي القذف ، وفي شرب الخمر .. كما نشرت قناة BBC فيديو لسمو صاحب الجهالة مليككم عبد الله وقال بعض المضللون كذبًا وافتراءا انه يشرب الخمر ( شوف ياخي البجاحة وصلت لإيه … بجاحة المضللون مش الملك طبعا … قال بيشرب خمرة قال )
وحتى في هذه الحالات الثلاث تراوح الحد عند بعض الفقهاء ما بين 40 و 100 جلدة وعند البعض الآخر ما بين 80 و 100 جلدة
الحدود بريئة من حكمكم إذن براءة عائشة رضي الله عنها من ادعاء ابن أُبي بن سلول
وإذا انتقلنا للوجه الآخر المبيح للجلد في الشريعة الإسلامية التي تدعون تطبيقها ؛ لوجدنا أنه التعزير
ولو كان القدر يا أصحاب السمو والجهالة قد أتاح لي أن اكون مدرسًا لسخافتكم لأمسكت آذانكم واحدًا واحدًا وملصتها كأشد ما يكون التمليص …
نتفق جميعا على أنكم تحكمون بالمذهب الحنبلي وقد اتخذتم منه المنهج لطلابكم والحكم لقضاتكم …
والتعزير عند الحنابلة يا صاحب الجهالة منك له لا يزيد على عشر جلدات
آه والله حضرتك يافندم عشرة من اللي هي قد صوابع ايديك دي
شفت بقى ان انا عندي حق وخايف على مصلحتك لما أقولك روح ادخل المدرسة من تاني …
وقد استدل مذهبكم في هذا الأمر بحديث رسول الله صلى الله عليه وسلم المروي في الصحيحين وأبو داود
” لا تجلدوا فوق عشرة اسواط إلا في حد من حدود الله “
وقد أخذ بهذا مذهبكم والليث واسحق وجماعة من الشافعية …
وما دمنا قد اتفقنا سلفا على ان الحكم بالجلد 1500 جلدة ليس حدا من حدود الله ، ولم يعد أمامنا إلا التعزير
وها نحن نرى امامنا حديث رسول الله الصحيح الصريح أن الشريعة لا تبيح الجلد فوق عشرة جلدات إلا في حد من حدود الله
فالحكم لايمت للشرع بصلة وعلاقته به هي ذات العلاقة بين الصراصير ونظرية النسبية
ولو افترضنا جدلا ان افقكم قد اتسع ليشمل حرية الرأي من المذاهب الأخرى والفقهاء الآخرون فلتعلموا أن التعزير عند بعضهم لا يزيد على 19 جلدة وهم الشافعية وبعض الحنابلة وعند بعض آخر لا يزيد على 30 جلدة وهم الأحناف وعند بعض ثالث لا يزيد على 39 جلدة وهم بعض الأحناف وعند بعض بعض رابع لا يزيد على 79 جلدة وهي رواية عن المالكية وأقصى ما ورد في هذا الأمر 100 جلدة وهو رأي ابن القيم وفي رواية عن المالكية
أما 1500 جلدة ؟ ليه هي سايبة وللا ايه ؟
وهكذا نعود الى ما اتفقنا عليه سلفًا فالحدود بريئة منكم والتعزير بريء أيضا بريء منكم والشريعة كلها بريئة منكم … اللهم إلا إذا كنتم تعنون بالشريعة شريعة هولاكو وهتلر فلا أجد لحكمكم شريعة غيرها
رحمك الله يا عمر … كنت تخشى أن تُسأل بالشاة التي تتعثر في الشام وتدخل يدك في جرح البعير المريض لتداويه وتخشى أن تُسأل به …
رحمك الله حكمت على ابن امير مِصر بالجلد قصاصا لغير المسلم …
رحمك الله قلت ” متى استعبدتم الناس وقد ولدتهم امهاتهم احرارا “
والخلاصة يا أصحاب الجهالة …
يلزمكم كام عشان تشتروا الكتاب ؟

المرسل/
احمد نور الدين

مثال من ملايين الامثلة لتطبيق السعوديين لشرع الله

مصر تمنع اطبائها من السفر للعمل بالسعودية

ناكرين الجميل بيقولو بكل بجاحة وسفالة ” مش هاممنا وهنتصرف ” … نسيتوا افضال المصريين عليكم يا….

ملحوظة : انا مش باكره السعودية بس باكره النفاق اللي فيها وحكامهم وكل من يواليهم ودي مشاعر موحدة تجاه كل حكام الدول الشئيئة بالمناسبة مش السعودية بس .. لكن الشعب اكيد فيه الحلو والوحش وان كان واضح من خلال النت ان في ازمة في السكر هناك

منشور في مجلة تحت الكوبري الالكترونية هنا

موباراك

==========

*** ( لقطة ) ***

————

أثبتت الترجمات ان معنى كلمة ” باراك “ في اللغة السواحلية الكينية ( بلد ابو باراك اوباما ) في اللغة العربية هو ” مبارك ” ، وليس هذا فحسب بل ان كلمة ” بنديكتوس “ ( اسم بابا الفاتيكان ) باللغة اللاتينيه تعني في اللغة العربية ” مبارك ” ايضا !!!

وهو ما يوضح ان ابو كلا من هاتين الشخصيتين لم يكن لديه طموح بسيطرة ابنه الأبدية فحسب بل كان يمتلك بعد نظر ايضا اذ ادرك ان اسم مبارك سيصبح رمزا للسيطرة الابدية ، سواء كانت شرعية او غير شرعية ، وهو ما يثير الشبهات حول نوايا هاتين الشخصيتين ( اوباما والبابا )

السؤال الذي يقفز الى الاذهان .. ترى كم ” مباركًا “ سنرى في العالم خلال الفترة القادمة ؟ وكم منهم سينجح في تحقيق حلمه ؟

——————————-

الترجمه على ضمانة موقع اليوم السابع

الزعيم الوطني .. المناضل الثائر .. فيس بوك

الزعيم الوطني .. المناضل الثائر .. فيس بوك

بلادي بلادي بلادي

لكِ جهازي وايميلاتي

مصر يا ام البلاد

انتِ اقامتي في المنتديات

وعلى كل العضويات

كم لدي إس إلك من ايادي

****

من فترة كده ( تحديدا يوم 4/8 ) كان المنتدى اللي شغال فيه ( باكتب فيه يعني ) واقف عشان بيتنقل لسيرفر تاني

وقتها كان عندي حالة نفور واختناق من المنتديات بصفه عامه ومن البلوجر كمان

اعمل ايه يابوووي ؟

ماهو مش معقول اتخبل في عقلي واروح مثلا ابص في مناهج السنه دي خصوصا وان ايام العز راحت خلاص ورجعت الدروس من تاني ولازم اجتهد في تضييع وقتي اليومين دول قبل ما المدرسين يوجعوا دماغنا بمراجعات والذي منه

وعليه مالقيتش قدامي الا كتاب الوش ( Face Book ) وكانت دي اول مرة ادخل الفيس بوك دخول فعليا

كنت قبل كده مجرد يوزر بالاسم وبس … وقايمة الـ Friends عندي كلهم مجمعهم بالصدفة

وبعدين قعدت اتأمل في الفيس بوك ده

وجه في بالي الاضرابات وحركات الوعي الوطني ( جامدة الوعي الوطني دي مش كده ) اللي هو كان مصدرها او مقرها على الاقل

فضلت اتأمل في الفيس بوك ده

مجرد موقع خطرت فكرته على راس بني ادم عادي في ساعة صفا ( غير بتاعت صفاء ابو السعود ) من غيره لا كان هيبقى فيه 6 ابريل ولا 4 مايو

وحاجات كتير كانت صورتها هتتغير من حياتنا اعلاميا على الاقل

دلوقتي الصحفي مش شرط عشان يعمل سبق صحفي انه يروح جبال الهيمالايا ويطلع جبل افرست ويعدي شلالات نياجرا ويخرم من الغابات الاستوائية … عشان يكتشف في الاخر انه نسى الفيلم بتاع الكاميرا وان القلم بتاعه ( عملها ) على نفسه !!!

في عصر الفيس بوك كفاية بس انه يبقى متابع النت وفاهمه كويس وهو قاعد في بيته قدام روتانا سينما مش قادر يغمض عينيه او بيتحدى الملل مع ميلودي

وسرح بيا الخيال لبعييييييد ( ماهو ليه اسرح قريب لما ممكن اسرح بعييييييد )

وقعدت اتخيل ملامح الثورة المصرية الجاية وما بعدها

مش هيضطر الثوار بعد كده ان كل واحد فيهم يستخدم شفرات سرية وتنكرات والافلامانات دي كلها عشان يعرف صاحبه ان ميعاد اجتماع الجماعه الجاي ( الساعة تلتاشر الف الا حتة ) …ومش هيضطروا ينزلوا وش الفجر ويمشوا على طراطيف ضوافرهم وبعدين يخبطوا باب الممر السري الموجود تحت الارض 11 خبطه ونص بين كل خبطه والتانيه 73 فيمتو ثانيه بالظبط عشان يطلع لك واحد بلمبه جاز يقولك” كلمة السر ” تقوم قايله ” السح الدح امبو … هنشيل الواد وابوه ” ( ومحدش يسالني مين هو الواد ومين ابوه )

وبعدين يتكلموا بصوت لا مسموع عشان ( الحيطان لها ودان ) ويطلعوا واحد واحد ( الانجليز ماليين البلد يا رجاله خدوا بالكم )

الفيس بوك بقى ثورة مودرن خالص

رسالة في الاوف لاين كفاية ( الرجالة هيتجمعوا النهارده الساعه سته يا سحس ) وممكن كمان تبقى بتخطط للثورة وبتبني مستقبل بلد وانت بتشيت مع المزه بتاعتك مش شرط تبقى طالع مركب تلاتين عين تراقب بيهم الطريق بضغطة ماوس كفاية عشان تطلعك منهم sign out

ولو انت ندل عادي ممكن تفك منهم بضغطة ماوس بس على leave group على الفيس بوك ومحدش هيهددك بصورة ليك مع زعيم التنظيم

وللا مناهج التاريخ دي اللي هتبقى حكاية هتبقى دروس التاريخ بعناوين زي :

” الثورة الالكترونيه الفيس بوكيِّة المصرية “

على شمال الصفحه صورة لحرف الـF البيضاء في المربع الازرق ومكتوب تحتيها شكل ( 1 ) .. الزعيم فيس بوك

وفي اقصى اليمين قايمة اهداف الدرس

• يتعرف التلاميذ من هو الزعيم ( فيس بوك ) ويدركون اهمية استخدامه
• يتعرف التلاميذ على احداث واهداف الثورة الالكترونيه الفيس بوكيِّة المصرية
• يعرف التلاميذ انجازات الثورة الفيس بوكيّة واهميتها
• يتعرف التلاميذ كيفية انشاء عضوية على الفيس بوك
• يتعرف التلاميذ معنى مصطلح Profile
• يتعرف التلاميذ كيفية الاشتراك في الجروبات وارسال الدعوات على الفيس بوك
• يتعرف التلاميذ كيفية انشاء جروب على الفيس بوك

وسرد احداث الثورة في يوم ..في شهر .. في سنة .. قامت الثورة الالكترونيه الفيس بوكيِّة المصرية على يد الزعيم المناضل ( فيس بوك ) وقد بدأت احداث الثورة عندما انشأ المشترك ( … ) جروبا على الفيس بوك اسماه ( اعلان العداء على الحاج ابو علاء ) ثم قام بعمل الدعاية اللازمة لذلك من خلال ايميلاته على الـ Yahoo والـ Windows live messenger وقد ساعدت علاقات ( … ) الواسعه على سرعة انتشار الجروب عن طريق الدعوات والايميلات وماسجات الموبايلات خصوصا في تلك الفترة التي انخفضت فيها اسعار الماسج عند فودا فون وموبينيل واتصالات ، هذا الى جانب الدور الوطني الكبير الذي قام به الزعيمين الوطنيين ( Blogger) و ( Youtube) في قيام الثورة فقد كانا انتيمين للفيس بوك ففي مقابل كل جروب ينشأ على الفيس بوك كان هناك مقال على البلوجر وفيديو على اليوتيوب وكذلك مصممي الجرافيكس الذين بذلوا قصارى جهدهم لتصميم صور جذابة للجروب من خلال الفوتو شوب وفي ذلك الوقت ، وقت الذروة عند زعماء الثورة الثلاثه ( فيس بوك وبلوجر ويوتيوب ) حينما اكنظت بالمقالات والفيديوهات ، كان افراد جهاز امن الدولة يحاولون عبثا ان يفهموا ولو جمله من كتاب

” تعلم الهاكرز في اسبوع “

علشان يهكروا على ( العيال ولاد الـ….. بتوع النت )

لكن على مين ياحسرة لسه ابو الهول ما نطقش

حتى ان السيد اللواء وزير الداخلية آنذاك ( الدجموني بلطجة ) اصدر قرارا وزاريا بخصم السبعه جنيه تمن الكتاب من مرتب المستشار صاحب الفكرة بتهمة اهدار الاموال العامه للدولة عبثا وبسبب اسلوب الاجراءات السائر في ذاك الوقت ( فوت علينا بكرة ) استغرقت عملية خصم السبعه جنيه اياماثم اعتراضاتواجتماعاتومحاكمواستئنافات كان جروب( اعلان العداء على الحاج ابو علاء ) قد ضرب ضربته القاضيهلما دخل الـCreator بتاع الجروب على الرئيس في قصره قائلا :

اللعبه انتهت يا ريس

BLOCK

بعد الوفد .. آدي الغد .. والوطني ولا هامه حد

***( تحديث مهم )****

——————

البديل عامله تغطية جامدة بالصور صراحة وفي شوية فيديوهات جامدة ع اليوتيوب

http://www.youtube.com/v/AJQ2Xsv_RgM&hl=en&fs=1

ودي صور من البديل بتوضح نظرية جرنال الدستور لما وصفت انصار موسى بالبلطجية

على فكرة انا لا بحب نور ولا موسى ولا حزب الغد من اساسه

بس الصور بتوضح حاجة لا يمكن انكارها .. دي حقيقة

دا بلطجي اسمه وليد كان بيقود مسيرة الحرق وبيوسع الصحفيين والناس من طريق موسى وانصاره

وبيولع هو واخر دماغ … يا معارضاتك يا مصر

شاهد الملف المصور للحريق من جرنال البديل

طبعا كلكو قريتو النهارده في الجرايد عن الحرب اللي حصلت في حزب الغد واللي خلته ولع ولعة ولا احسنها مجلس شورى .. ولا اجمدها ماس كهربائي

حرب حصلت بقنابل المولوتوف بين اعضاء الحزب .. انصار ( ايمن نور ) ضد انصار منافسه على زعامة الحزب ( موسى مصطفى ) [ ونعم المنافسة والديمقراطية صراحة ]

تقريبا ممكن نعتبر ان جرنال المصري اليوم هو الوحيد اللي نقل الخبر بصورة محايدة .. فحدد اطراف الصراع بأنصار ( نور ) وأنصار ( موسى ) .. بخلاف جرنال البديل والدستور اللي انحازوا لأيمن نور في تقريراتهم الا ان الدستور كان منحاز بشكل اكبر [ طبيعي عشان ايمن نور بيكتب فيه ] فقال ” انصار ايمن نور ومئات من البلطجية “ وكان منحاز بصورة واضحة في تقريره لأيمن نور .. اما الاسبوع فكان منحاز بصورة واضحة هو كمان ولكن لموسى .. فجه المانشيت الرئيسي بتاعه في الصفحة الاولى وبالبنط العريض ان ” انصار ايمن نور قامو بحرق حزب الغد “ .. ( الخبرعلى الجزيرة نت كمان )

مش عارف ليه موضوع الاحزاب دا مش مطمني .. حاسس ان وراه ” إنن ” كتير .. مش ” إن ” واحدة بس ..

طب يعني تفتكروا مين المستفيد من ورا الحرب دي ؟

حرب زي دي كفيلة بأنها تقضي على سمعة وشعبية الحزب

مين هيثق بعد كده في حزب الغد او الوفد اللي كانوا محتلين المركز التاني والتالت في الانتخابات الرئاسية الأخيرة ؟

مين المستفيد من اقصاء الناس دي من الطريق .. خصوصا مع اشتعال موضوع التوريث ؟

هياخد ايه ايمن نور ولا موسى لما الحزب ينهار ويفقد شعبيته ؟

وكأن الحكومة ( او الريس تحديدا ) بيقولنا ” شوفو الناس اللي كنتم عاوزينهم يحكموكم بدالي بيعملوا ايه في اللي بيعارضوهم منهم ” خصوصا بعد ما لقى ان ايمن نور ” مبهدله ” في الصحافة ولقى ان القضية اللي متلفقة له مش مأثرة على شعبيته اللي بتتزايد اكتر واكتر كل يوم على النت والصور والشعارات اللي بتطالب بحريته عمالة بتزيد فأمر بتدبير الموضوع ده عشان يخلص منه على نفس طريقة نعمان جمعة ؟؟؟

يعني ياترى الموضوع دا متدبر .. ولا ربنا بعتهولنا عشان يكشف لنا عن معادن الناس دي ؟؟

وياترى الاخوان هما كمان لو عملوا حزب ممكن يشوف نفس المصير .. ولا هما الخلافات بينهم مش ممكن توصل للحد ده ؟؟

*** ( تحديث ) ***

————–

اليوم السابع .. قالت ان النيابة اخلت عن المتهمين ….

نكسة صداقة

نكسة صداقة

قصة قصيرة … بقلمي … كتبتها بتاريخ 26/7/2008 م

***

انسابت على وجنتيه دمعة ساخنة ॥ تماما ككوب الشاي الذي يرتشفه فسارت عبر تجاعيد وجهه تلك التي لايضاهيها عددا الا سنوات عمره عيناه على اولئك الرائحين الغادين امام المقهى ، فيم كان عقله وروحه بعيدين عن ذلك تماما ، تنبه فجأة على حبيبات الشاي التي تسللت الى جوفه بعد ان فرغ من الكوب وهو لا يدري ؛ فسعل ليخرجها ، خرج سعاله خشنا واهتز له جسده حتى بدا وكأنه يحتضر ، ثم بصق على الارض ومسحها بحذائه ومسح على فمه بكمه فأصاب التقزز بعض الحاضرين ممن رأوه ।

نقد صبي المقهى ثمن الكوب ونهض فبانت ملامح جسده اكثر ।

جسد متهالك ذو ظهر محني قد برزت فقرات عموده يعلوه وجه متغضن حافل بالتجاعيد ، جلده مفصل على عظامه فلا يكاد يفصل بينهما شيء وعيناه غائرتان يعلوهما حاجبان لا يكادان يُريا ، يتدلى من كفيه ذوي العظمتين البارزتين ذراعين كأنحل ما يكون ، ينتهيان بكفين مرتعشتين يمسك بإحداهما عكازا يساعد قدميه النحيلتين على حمل جسده ।

على رأسه طاقية مهترئة من الصوف تغطي شعيرات معدودات مشتعلة بالشيب ، ولا يستطيع احد ان يخبرك على وجه الدقة منذ متى يرتدي تلك الملابس المهلهله المحفوفة بالرقع ولا ذلك الحذاء الذي مل منه الاسكافيون ।

حملته قدماه في طريق حفظتاه فسارتا فيه دونما احتياج الى توجيه عقله ، الذي كان لا يزال في تلك الافق البعيدة سارحًا ।

لم يلبث ان وجد نفسه امام المدافن التي اصبحت تعرفه كما يعرفها ، سار حتى بلغ قبرا قديما للغاية كُتب عليه بحروف كادت السنين ان تمحيها

قبر الشهيد
لطفي صالح السيد
” وَلاَ تَحْسَبَنّ
الّذِينَ قُتِلُواْ فِي سَبِيلِ اللّهِ أَمْوَاتاً بَلْ أَحْيَاءٌ عِندَ رَبّهِمْ
يُرْزَقُونَ “

ووسط جو صمت الاموات المخيف الذي يسود المكان تدفقت دموعه الدافئة اكثر غزارة على خديه ، وتحركت شفتاه تتلوان آيات من الذكر الحكيم ، وتقهقرت به عجلة الذاكرة الى الوراءقبل ما يربو على النصف قرن ।
***

– شاااااوقييييييي ياشوقي ، انت ياشوقي

– يادي شوقي وسنين شوقي ، ماترحم شوية ياعم لطفي ، احنا في اجازة وعاوزين ننام ।

– بطل رغي وانزل لي حالا ، عاوزك

– حاضر ॥ حاضر

غسل وجهه وارتدى بذلته وصفف شعره على عجل ، القى على هندامه نظرة في المرآة ثم ارتدى حذائه وهبط الى الشارع بعد ان اخبر امه ورفض تناول فطوره بعد الحاح منها ।

– ايوة ياسي لطفي ، ايه ياترى سر الزيارة السعيده دي ؟

– البلد بتتضرب ياشوقي

– فال الله ولا فالك ياخي ، مالبلد زي الفل اهيه ।

– مش هنا ياشوقي ( ثم مشيرا بيده شرقا ) هناك ।

استدار شوقي مفزوعا الى حيث اشار صديقه لطفي ولكن عيناه لم تلبثا ان كذبتا ظنونه فقال في شبه غضب :-

فين بس يا لطفي ؟ انت اتجننت ؟ ولا بتضحك عليّ ؟

– ياشوقي هناااك ، عند بورسعيد والاسماعيليه والسويس ، فرنسا واسرائيل والانجليز بيهجموا ।( ثم بلهجة المقبل على اذاعة امر جلل )- بيقولو كمان ان الهجوم دا كان متدبر

انتظر رد فعل وقوع الخبر ( الجلل ) على صديقه بيد ان ظنونه لم تلبث ان خابت حينما تناهى الى مسامعه قول صديقه :-

طب واحنا مالنا يا لطفي بالكلام ده ، دا بتاع الكبار

في نفاد صبر كاد ان يخرجه عن طوعه – لا كبار ولا صغيرين ، انا عاوز اروح احارب هناك ।

وبنفاد صبر يضاهيه رد عليه شوقي :

– تروح تحارب ؟ انت اتجننت يا لطفي وللا ايه ؟ تروح تحارب ازاي وانت يادوب ماكملتش اربعتاشر سنه على بعض ؟

– اهو كده وخلاص ، يعني معقوله ياشوقي نبقى بنلعب وبلدنا بتتضرب واهلها عمالين يموتوا ؟

– واحنا في ايدينا ايه نعمله ؟

– اي حاجه ياشوقي بس مانقفش كده ।

وانتهى حوارهما الى الا شيءولم يلبث العدوان ان انتهى كذلك ومضت بهما السنون يتشاطران الحزن والفرح في اسمى ايات الصداقة لا يفترقان وان افترقا فبجسديهما فقط لاجل الاسباب ، يرتقيان سويا سلم العمر والدراسة حتى وصلا الى قمة الاخير وتخرج كليهما في كلية الحقوق وحانت فترة التجنيدأُعفي منها شوقي لكونه العائل الوحيد لاسرته ، وذهب اليها لطفي

كان وداعا عجيبا حافلا بمتناقضات المشاعر حمل لطفي حقيبة اغراضه الصغيرة ، سعيدا كما لو كان عريسا ذاهبا الى عرسه ، حزينا كما لو كان مريضا يفارق روحه غادر وودعه شوقي حتى محطة القطار يقاسمه – كما اعتاد دوما – فرحته وحزنه ذهنه كان يموج بالتفكير والقلق ، كان يعلم بأن الخلافات مع اسرائيل على اشدها ، والرئيس عبد الناصر يتوعد بالقاءهم في البحر وثمة حرب ضروس مشتعلة الفتيل وعلى وشك الانفجار ولطفي لن يتردد بإلقاء نفسه في غمار تلك الحرب …فتوسل اليه وهو يودعه ان يحافظ على نفسه لُحيظات وأذن المؤذن بالرحيل فودعا بعضيهما الوداع الاخير ، وتحرك القطار حاملا لطفي وتفكير شوقي ، تاركا شوقي بلهفته وخوفه وقلقا ، يدعو الله مخلصا من صميم قلبه ان يحمي لطفي ويحفظه وينصره ( على عدوينه ) حتى غاب القطار عن ناظريه فاستدار عقبا وعاد من حيث اتى ।رجع الى منزله وبدأ – للمرة الاولى في حياته – بمتابعة كل نشرات الاخبار وما ينشر في الجرائد يترقب كل يوم خبر اندلاع حرب مع اسرائيل ومضت به الايام خائفا مترقبا حتى كاد ان ييأس من اندلاعها حتى اتى ذلك اليوم

الخامس من يونيو عام 1967م

استيقظ على خبر ذلك الهجوم الاسرائيلي المفاجئ اخذت الاذاعة المصرية تذيع انباء انتصاراتنا ، وتلك الخسائر الفادحه التي تكبدتها قوات العدو على ايدي جنودنا البواسل وشوقي – ككل مصري – يتابع كل ذلك ويكاد يطير من الفرح وقلبه يرقص طربا ।كان يسمع اسم لطفي في كل خبر انتصار …ويشم رائحته في كل خبر خسارة للعدو …ويكاد يراه وهو يقتلهم وينتقم منهم فيتكبدون على يديه عظيم الخسائر رآه حامل اللواء المصري في مجابهة الكيان الاسرائيلي الغاصب ، ودونما دراية منه جرت على لسانه

-والله صبرت ونلت ياواد يا لطفي

اخدته سكرة النشوه واحس كأنما هو المحارب المنتصر فحملته اجنحة الفرحة وحلقت به في سماء السعادة فأخذ يرسم الاحلام الوردية لمستقلبهما معًا ويتذكر لحظات طفولتهما سويًا وتمني لطفي الخروج للحرب وقتها فتتضاعف سعادته।ولكن الزمن لم يمهله ليهنأ بتلك الفرحة كثيرا ، فجاءته حقيقة الخبر مطاراتنا دُكت ، وسيناء اُحتلت ، و…

ولطفي استشهد

لم يصدق الخبر في البداية بل اخذه على محمل المزاح كان الانتصار عنده حقيقة واقعة هي اشبه بالعقيدة التي لا تقبل الشك لكن ذلك كله لم يلبث ان تأكد وقع المُصاب ، وحلت الهزيمه ، و…-لأ

احس بغصة في حلقه وبالدموع تفر من عينيه ، يحبسها فتروغ منه ॥ لا يمكن

أهزموا بالفعل ؟

أمات لطفي حقا ؟

أصبح مجرد ذكرى …

خيال …

جثة بلا حراك ولا حياة ؟

كيف له ان يحيا من بعده ؟

كيف يهنأ له عيشه لحظة واحدة بعد رحيل رفيق عمره ؟

هل يمكن ان يستكمل احلامه وحده ؟

كيف له ان يتحمل المصيبتين ॥ الهزيمة ، والفقدان ؟

هل يمكن لليد الواحدة ان تصفق ؟

فكيف لو كانت تلك اليد مكسورة اصلا ؟

أي حياة تلك ؟

إن الموت لافضل منها الف مرة

تمنى لو كان محاربا الى جوار صديقه

تمنى لو هُزما وقُتلا معا

سنوات قضاها بعيدا عن العالم بروحه

آل على نفسه الا يشاركه بشر حياته

حتى لو كانت زوجة

سارت به عجلة الايام ، تتخبطه النوائب ، وتتخطفه عوادي الدهر ، بعد ان حذف من قاموس حياته كل معاني السعادة ।اصبح جسدا بلا روح ، مريض بلا طبيب ، كل يوم كان يزور قبره ، ويجلس على ذات المقهى التي تعودا الجلوس عليها حتى اثقل الزمن كاهله ووهنت صحته وناءت قدميه بحمله ؛ فما عاد يذهب كسالف عهده ।وحدهما عقله وتفكيره لم يزالا به مشغولين ।ترى كيف هو الآن ؟هل نال ما يريد بشهادته ؟أكان يبغي الشهادة ام النصر ؟أيشعر بالسعادة في قبره ؟ترى هل يفتقده في فردوس الشهداء ؟تنبه حينما أذنت الشمس بالغروب وبدأ جيش الظلام يغزو السماء ؛ فنهض في تثاقل باغيا العودة ।وقبل ان يستدير تمتم بصوت واهن حمل حزن كل تلك السنين :-

الله يـرحـمـك يـا لــطـــفـــي

{ تمت بحمد الله }

6